四十八孝歌　上本 四十八孝歌　上集　竹林印書局印行 只本歌仔即新編　勸恁老輩甲少年　只號歷史兮古典　孝子一个四句連 我念四十八有孝　大舜起基排做頭　親生个母死了後　後母苦毒目屎流 第一行孝姚大舜　三皇以後伊聖君　將伊有孝來皆論　實在有影石斬痕 四八孝子來廣起　算是大舜上開基　孝子是伊做宗旨　歷代即兮出孝兒 許時堯帝塊坐天　大舜老父𫔘青冥　有孝旣在後母變　百般受苦那親生 後母苦毒無哀怨　百般順從伊甘愿　堯帝知影伊只款　御駕訪賢入山川 後母實在無天理　六次毒計來害伊　六擺乎伊害無死　堯帝殿內得知枝 堯帝招伊做子婿　所以理由朗巢知　公主帶在伊厝內　每日報告寄返來 堯帝公主名英鳳　三從四德甲正宗　賢女有听堯帝廣　即嫁大舜去耕農 堯皇二个查某子　娥鳳女英共二名　助舜行孝眞四正　尫某接位好名聲 第二孝子是漢文　漢朝有道兮仁君　伊有只款行孝順　做人着愛守五倫 伊做人主化富貴　全無貪戀正貴妃　見着太后眞好嘴　每擺請安拜甲跪 遇着太后致病症　不識離身致奉承　親身共母捧燒冷　身軀不離眠床前 太醫開藥醫太后　文帝親身悅烘爐　藥仔煎好試甘苦　眞是有孝个乾埔 第三曾參共恁講　貴州鹿村崇玄江　為着有孝情眞重　出門請令示大人 伊厝離城八十里　每日落街賣柴枝　賣柴買肉甲糴米　搭酒奉敬母親伊 曾參扣柴入山內　遇着母舅伊厝來　因母無物通款代　一心想卜子返來 母舅伊來母想子　暗咬指頭叫三聲　曾參一時心肝痛　返來跪母在大廳 第四孝子閔子騫　年登十二亦恰賢　見在後母塊調典　甘心有孝受苦然 後母果然不是人　勸恁姉妹先不通　親子綿裘斤外重　子騫綿裘入杆芒 閔子老父卜出外　着坐手車叫伊拖　身穿杆芒皮々蔡　天落霜雪透路跋 因父隨知這條理　後某甘愿卜皆離　子騫求情即中止　後母了解眞痛伊 第五孝子是子路　有孝實在有功勞　名揚天下此查埔　孔子收伊作文徒 子路有孝不驚赤　賢人伊即有一額　苦菜提來自己郁　米飯流乎因母食 母親米飯塊奉敬　自己着食猪母乳　到尾伊會入大聖　亦是有孝个苦情 楚國做官因母死　隨時辭官無愛碟　去甲孔子學道理　第五賢人就是伊 第六鄒子是一等　名聲眞好人文明　因母無齒物嫌碇　獨獨想卜食鹿乳 听因老母治塊廣　深山林內有虎狼　鄒子自己想套棟　身穿鹿皮變神通 身穿鹿皮假鹿子　鹿母歸陣不知驚　暗帶柴桶通去抦　着律一桶即有行 𫔘着蚋夫險無命　鹿皮脫開緊化聲　蚋戶毒个通知影　鄒子𫔘排第六名 第七有孝是董永　賣身葬父董分生　應該到伊着無種　董永有孝感天庭 分生董永兮父親　字名伊是叫董臣　傳到董永皆着尽　好得董永太認真 董永有孝免絕代　天賜仙女加治來　仙女來皆理家內　榮華富貴報恁知 仙女來乎伊做某　共伊傳嗣在皇都　勸恁朋友無失悞　着學董永兮規模 第八孝子是姓江　江格孝子排八人　反亂背母山頂潛　母子去帶石頭空 反亂兮時無認主　見人拿去吊金龜　江格尋食去眞久　伊母乎賊拿去拘 江格尋食返石洞　尋無因母心忙忙　听見路邊人塊廣　赶緊走去見賊王 去尋賊王開聲哮　賊王看伊眞行孝　白米煞賜伊二斗　煞賜猪肉乎珍頭 第九孝子是老萊　安居市行大路西　七十二歲兮戲彩　流傳世間通人知 看伊父母塊憂愁　老萊有孝食目周　走下邊頭去研究　用心改鬱母心憂 老萊裝作囝仔子　念歌唱曲因母听　乜有奇術都尽抦　用心改鬱母心成 老萊演戲甲挑水　假意跋倒起雷追　因母走來皆好嘴　因父笑甲嘴開開 第十孝子是蔡順　字名叫做蔡首倫　少年貧赤呆字運　遇着王莽亂漢君 蔡順𤆬母去避亂　貧赤無通帶飯丸　採桑奉母伊甘愿　不驚路呆共嶺高 那卜採桑來廣起　知影通人可憐伊　能酸能澀伊加治　奉承因母苦甲甜 好兮樹子做記認　賊王細查即知眞　看伊孝子即相信　賜伊米菜奉母親 十一郭鉅眞孔交　夫妻双人平平肴　尫某双人眞行孝　兮曉愛尾着想頭 一子三歲眞呆壁　見物不食惡夯夯　家庭又閣眞散赤　甲因老母相爭食 切心將子卜去賣　飢方省卜夯人架　尫某双人想一計　抱來去埋土脚底 因某抱子菜園去　郭鉅鋤頭夯一枝　掘着黃金打名字　玉帝知影賞賜伊 十二有孝是楊香　守川兮子號日長　有影骨力眞勉供　隨父耕田在奔龍 奔龍所在有出虎　咬人專着下半肚　守川一時來失悞　乎虎驚倒在奔湖 楊香十分个孝子　打虎不驚損身驅　將身拼命甲虎舞　暗中神祈皆燒符 楊香有孝感動神　奔湖打虎救父親　眞眞有影無迷信　剝皮刈肉去賣銀 十三孝子是六制　六歲有孝甲整齊　袁術請伊做人客　吟詩做對獨項兮 六歲有孝甲利害　袁術甲伊眞埔排　小漢見物兮曉愛　出治三國報恁知 袁術請伊食燒酒　偷提桔子起虎鬚　伊煞偷提無過手　袁術笑伊無理由 六制被笑面紅紅　說乎袁術伊知空　老母伊愛不敢講　提物卜敬示大人 十四孝子唐雲釵　查某孝子排頭个　本身做母子眞多　乳水甘愿奉乾家 續尾个子抱去賣　乳奉乾家伊一个　乾家無齒食呆勢　乳水乎伊做湯茶 想伊乾家無嘴齒　乳哺奉敬伊三年　伊做模樣乎人比　到尾代代出孝兒 因子做官名山南　即做表章去朝參　皇帝知影伊崁鏨　賜伊孝坊竪雲南 十五黃香在江夏　孝子伊排十五个　我共恁報恰上世　古代出治人之初 九歲兮曉冷溫蓆　冬天被蓆先困燒　奉承父母免人叫　大人塊伊都袂着 驚伊父母無甲被　每暗房宮巡三回　厝內不離烘爐火　燒茶不時拴一鍋 有孝天就從人愿　出門身分亦恰高　十二舉人就上選　十五伊就中狀元 十六孝子是姜詩　只條古代眞正奇　因母年登八十四　愛食河水兮鯉魚 因厝離江數百里　路頭眞遠相似天　尫某相𤆬獨日去　因某汗水伊拿魚 姜詩受苦不敢廣　有孝感動水仙王　因厝脚兜裂一洞　化做鯉魚直直藏 有孝那甲學有起　塗脚都兮出鯉魚　人說貪瓜着念致　到尾子孫有孝伊 十七孝子是王晡　因厝安居在成都　雷公那陳伊上苦　因母第一驚一途 天頂雷公那珍動　因母驚甲亂亂藏　好嘴共因老母廣　燒香門口求雷公 尾手因母死了後　天黑伊就到墓頭　一聲叫天一聲哭　双脚跪落塗脚兜 因母死了亦眞苦　我今改勸朋友徒　父母死了墓着顧　不通放棄成草埔 十八丁蘭說已定　卜對不孝廣大先　因母汗飯冷嫌冷　燒來嫌燒母傷情 丁蘭山內塊鋸枋　看見烏鴉塊咬虫　即想父母恩情重　臨時有孝示大人 因母汗飯卜去接　伊母着驚跳落埤　丁蘭隨跳落水去　尋着柴頭做母尸 即想父母兮恩情　神主是伊設大先　三當米飯塊奉敬　親像在生成成成 十九孝子是吳猛　孝子只个上苦情　貧赤親像無字姓　無親無戚通牽成 冬天無被伊甲草　破裘破被父母包　下曉十分下有孝　大人都無伊靴肴 冬天過了春天到　想無蚊罩目屎流　吳猛尽心塊行孝　有蚊伊先飼做頭 吳猛有孝身飼蚊　因為有孝示大人　旣在蚊咬不振動　咬煞即叫父入房 二十孝子是王祥　有孝十分眞苦傷　後母毒心甲無量　父親不識在家中 後母想卜害伊死　冬天想卜食鯉魚　霜寒雪凍叫伊去　孝子神明來扶伊 王祥行到到港墘　天落大雪水面邊　埔甲水密看不見　王祥受苦守一冥 王祥衫褲脫光光　倒落雪面做眠床　認寒旣在霜雪鑽　雪破鯉魚掠一矼 廿一有孝壽昌伊　宋朝眞宗許冬時　小漢就倩乳母飼　不知因母是小姨 壽昌因母是小姨　中厚大娘苦毒伊　毒心煞共伊賣去　壽昌小漢不知機 尾手大娘死了後　即知因母是姓劉　太守不做辭官走　尋無生母不回頭 壽昌尋母五十七　去尋一年六月日　東州見母一粒一　母子相見親密密 廿二孝子是岑婁　漢朝元祐兮年科　原做白身官不做　辭官退職返家和 岑婁做官伊無愛　辭官退職即返來　到厝父親病眞害　雖時天庭皆消災 跪落當天親口講　滅壽卜替是大人　燒香當天說下項　一擺北斗拜七工 好的北斗神庇佑　父親免藥病清休　到尾食足長歲壽　名聲眞好傳千秋 廿三孝子是孟宗　有孝恰人不相同　那因老母塊希望　天頂仙桃想卜摸 因母思念食冬筍　老人四季袂曉分　孟宗為子守職份　卜尋冬筍通來群 尋無跪竹哭冬筍　觀音走去問世尊　世尊去恰玉帝論　即派天尊下天門 廣法天尊下天亭　山神土治吊大先　雖時做法下笋種　天光生甲歸厝前 廿四孝子黃庭堅　官做太守在御前　親身共母拼大便　有孝無人即年賢 女婢拼屎唾痰涎　傷着庭壁兮心肝　親即用情乎人看　某子即識五倫壇 庭壁提屎來試驗　試看屎苦亦是塩　屎苦母親未風險　風火有落心未砧 庭堅試屎驚母死　世間無人通比伊　地號即改孝坊里　皇帝御勅竪孝旗 廿五行孝是姬公　着是周朝周文王　每个罵識听人廣　到尾滅紂即成功 四十八孝歌　下本 四十八孝歌　下本 文王老母身那疼　三當粥飯親手捧　有孝二字天感重　賜伊公子一百人 文王有孝眞尽禮　賢婦得着廿四个　本身做了眞好底　妻妾全不識冤家 文王有孝子一百　尾鰍即有通大拋　亦是文王好家教　註解孝經傳無差 廿六孝子鄭顥考　東周古代不是無　那有物件提返倒　無敬因母食袂落 遇着莊公筵君臣　酒筵海味甲山珍　感謝君王眞人敏　算是鄭國大賢人 莊公起先大不孝　顥考說謝即回頭　看伊物件到嘴口　專專用紙包歸包 莊公恰母絕相會　考叔感重想返回　伊勸國王能反悔　咱着改勸囝仔胚 廿七王修眞有孝　七歲就兮哭墓頭　春社想母走去哮　慘情哭倒塗脚兜 𫔘着一陣囝仔鄙　歸陣走來卜尋伊　看伊哭甲無捨世　歸陣恰伊哭相天 囝仔心肝退伊軟　退伊哭破腹肚腸　眾人父母都來勸　看着退伊心肝酸 古早春社節有做　為着王修即改無　有孝名譽即年好　勸恁少年着來學 廿八孝子是曹女　曹娥落水尋父尸　伊父失落水底死　甘願落水去尋伊 曹娥有孝去落江　女人只款無幾人　雖然兮死名聲重　身無變色肉紅紅 曹娥落水身未死　救苦眞君來就伊　續後修行做仙女　長生不老在瑤池 投水去尋三日久　手牽父尸水面浮　百姓走去報官府　聖上賜伊節孝符 廿九太倉查某子　為父續罪去上京　漢朝古代眞有影　愛珠就是伊兮名 愛珠甘願做犯人　退父受罪名聲香　小小女子情即重　比咱男子恰光通 願做宮娥換老父　只款孝女尋幾个　孝女感動漢文帝　賜伊父女𤆬回家 眞心有孝那卜做　恰大危險能變無　文帝兮曉想撤套　即賜孝坊大功勞 三十孝子張玉机　周朝古代眞正奇　艱苦乾家自尽死　驚了食老連累伊 小姑去告伊害死　含冤受屈做一時　官府辦了無明理　害伊牢獄關三年 有孝二字大利害　可旱三年雨無來　齊王求雨即知代　赦伊無罪賞金牌 玉机有孝做有清　天公能退伊不明　那是不孝呆心行　罪名雖時透天庭 卅一伯兪哭竹板　十分有孝傳世間　因母失力人恰懶　手有竹板哀哀餐 恰早母打不識哮　伊哭無痛知母老　手抱竹板大聲哭　只款有孝實在賢 有听孔子塊廣起　父母幾年愛知機　打能眞痛伊歡喜　安年有奇眞孝子 伯兪八歲就有孝　也是心肝生眞肴　孔子傳伊儒道教　金榜顯名好尾梢 卅二孝子是毛義　尋無几个親像伊　皇帝出旨請伊去　封伊官職伊不碟 甘心逆旨順父母　不驚去染着官符　皇帝知影即賞賜　賜伊金銀甲珠寶 毛義逆旨不免刣　論眞有孝眞靴排　品行做好聖上愛　官做首相位三台 毛義宰樣來逆旨　為着寡母守孤兒　母親頭毛白薛薛　做官無通奉承伊 卅三有孝是劉陽　刣鷄敬母在家中　名聲煞透到聖上　皇帝即去伊家鄉 皇帝全工去因厝　龍補無穿在身軀　劉陽刣鷄塊敬母　有影有孝無虛詞 劉陽有孝有實在　皇帝卜賞伊金牌　當面賞伊驚無愛　貼貼勸下行出來 劉陽扣着大步赶　提去衙門交縣官　縣官親手接來看　賞伊有孝兮因單 卅四陳雷做衙役　出差去帶成都城　伊母愛魚無塊寄　古早又無造火車 孝子第一肴變蚊　提起竹管來透空　內面青魚入歸桶　入好卜寄又無人 求天即放落海底　遇着巡海兮夜叉　夜叉送到因後尾　因某看見緊來提 因某卜那能知影　看見竹管有刻名　緊緊提入厝內拼　拼出青魚滿大廳 卅五杜允眞孝義　因母心性第一奇　一生眞愛食飯鄙　伊扣歸宮奉母伊 孝子存長甲肴勸　遇着反亂又飢方　好得鼎鄙食過當　不免飫餓食薯榔 飢方餓死歸大堆　孝子即免受克虧　米糧親像金靴貴　好得飯鄙通解圍 飢方母子餓無死　到尾皇帝煞知枝　皇帝希望叫伊去　孝坊共伊竪一枝 卅六元明亦有孝　因母死了哭墓頭　驚人牽牛食墓草　每日巡守無停留 田夫性質足成呆　破衫破褲湳滲來　驚了風水兮防害　墓前大樹買來栽 墓前栽樹遮母面　故着母親兮元神　外頭用過籬巴篦　勸恁着學伊認眞 驚了人傷伊風水　水田買來自己開　耕田煞犂着鐵櫃　黃金白銀得一堆 卅七孝子是徐陵　每日焚香誦孝經　因為母親染病症　孝經誦唸無時停 誠心即誦二三工　因母隨時變好人　孝子二字天感重　不免食藥能輕双 論起徐陵答母恩　孝子点点都註神　孝經反覆唸不尽　跪治塗脚無翻身 誦經簡兮即感應　朋友着愛听分明　那是不孝做呆行　加誦根熟討無榮 卅八華光亦孝義　四歲兮曉通讀書　又卜乖巧甲伶俐　能畫山水甲吟詩 孝子第一足肴想　因父形圖畫落箱　父親死了那思想　即提形圖來燒香 華光賢孝甲本等　生成有孝兮心情　畫父形圖眞齊整　親像在生化年成 自己父母不公敬　論眞不免拜神明　那是只款來比評　恰好拜佛甲誦經 卅九孝子是秦女　姓秦木蘭人女兒　因父出征塊卜去　女辦男粧去替伊 木蘭有孝不驚死　女人恰肴人男兒　十六出征恰人去　頭尾干苦十二年 秦公養老去出征　好得女兒眞才情　皇帝知影眞感應　賜伊孝坊加文明 退父出征大孝義　捨身行孝伊無辭　女人只款大志氣　勸恁姉妹着學伊 四十孝子是高柴　孔子學生無爭差　品行有受聖人教　不敢脚步湳滲踏 高柴有孝老母死　伊去守墓哭三年　遇着反亂天改變　甘愿不離母墓邊 高柴守墓青慘哭　通庄賊馬四面包　因母墓前賊袂到　猛虎塊加守路頭 猛虎兮來加守墓　算來孝子上有功　免乎賊馬刼去貢　平安可比安樂王 四一孝子北宮女　第一青慘着是伊　令女單身無兄弟　父母想慘苦切啼 因母哀怨塊苦切　驚了飼大別人个　令女發願不去嫁　甘願鉗苦養一家 看因老母塊苦疼　跪落改勸示大人　令女發願節孝重　夯刀割鼻不嫁尫 割鼻尽情奉父母　一點孝心透天曹　仙母知影眞呵惱　賜伊三粒正仙桃 四二孝子狄仁傑　出在唐朝無簡捷　則天坐位無相設　只欵有孝生恰孽 仁傑出巡去別位　山頭罩霧結歸堆　看厝袂着喘大愧　手比雲霧即時開 天黑地暗眞僥倖　仁傑手比即時清　論眞孝子上高等　做事天公都諒情 孝子那兮做四正　石頭伊都吪兮行　古然孝子嘴足聖　實情勸恁朋友兄 四三孝子程雲恭　身居魏地號太梁　為親有孝眞勉強　家庭散赤眞可傷 散赤有孝着認眞　天公刁工試賢人　秋後時瓜生了尽　尋無此物奉母親 𫔘着因母起熱症　念食時瓜無時停　雲恭有孝無想冷　街頭路尾走去爭 愈着佛祖對者過　化作和尚送時瓜　到尾伊食百外歲　成仙去赴蟠桃會 四四孝子是徐份　出治五代說分文　伊用有孝做根本　每个稱呼徐孝君 只个父親名徐陵　為父求壽誦孝經　神明治人頭壳頂　有孝隨時透天庭 玉帝知影伊有孝　賜伊富貴好尾梢　又賜孝子食老老　六代相見上山頭 父子平平長歲壽　有孝古然好尾鰍　勸恁朋友着研究　名聲眞好傳千秋 四五張元共恁廣　伊兮有孝因阿公　樹無樹頭袂得旺　恩甲父母是相同 因兮公公眼失明　先生請教數十宮　尋無回春兮本頂　苦切心肝自己爭 張元想着哭僥倖　勿然想着藥書經　有註理由治百症　不免用藥目能明 張元誦經順經理　藥師顯聖來加醫　公孫二人眠夢見　三日好甲離離離 四六有孝李佰健　晋朝武帝兮大賢　父親早死母改變　放下媽孫眞苦然 佰健有孝因阿媽　只是晋朝傳甲今　七歲伊着担一担　退媽煮飯甲洗衫 外面着去共做工　厝內那做查某人　磨破手皮忍耐凍　想着心酸目篐紅 有孝感動晉武帝　宮內美女送二个　乎做牽手通皆退　一家富貴眞整齊 四七有孝是崔賓　唐朝太祖兮忠臣　官做太常位一品　看伊有孝足認真 京都城內塊做節　不論六市共三街　花燈鼓樂眞成多　皇宮官衙都整齊 崔賓有孝行有修　鬧熱𤆬母街上遊　拖車母坐伊親手　紗帽錦袍放血丟 衆人知影伊到位　恰大官員都閃開　孝子即有只点貴　相似帝王靴英威 四八孝子陳叔達　只个有孝上尾層　四八行孝眞希罕　伊𫔘四八傳世間 尾个孝子亦眞好　因母眞愛食葡萄　有孝心神食在奧　有時兮有有時無 堅心研究葡萄種　望卜四季能收成　年年不時通奉敬　只款孝子有實情 觀音顯化皆点醒　春夏秋冬通能生　伊罩四八𫔘好鄭　乎人流傳眞達錢 四八孝子編到者　勸恁心肝不通邪　着學孝子个性癖　一生免驚趁無食 四十八孝總有名　即編勸世乎恁听　好呆根熟人个命　着學有孝恰好名 用只歌仔勸大家　理由廣甲白白白　乎人听了性那改　正好先生倩三个 不但大家卜听教　自己性情亦有差　歷代古今听透透　有孝兮人好尾梢 勸恁少年着孝義　後繼即有好子兒　汝看四十八孝子　萬古流傳好名譽 孟母當初塊教子　只條古典設恁听　本身又閣做四正　教子入聖好名聲 人之初內治塊廣　燕山教子有義方　是照古代提來創　不是編歌廣凸風 是我腹內字恰淺　不比別人歌仔先　着學孝子兮古典　四十八孝歌新編

Item sets

Media

ntul-tm3431361_0001 ntul-tm3431361_0002 ntul-tm3431361_0003 ntul-tm3431361_0004 ntul-tm3431361_0005 ntul-tm3431361_0006 ntul-tm3431361_0007 ntul-tm3431361_0008 ntul-tm3431361_0009 ntul-tm3431361_0010 ntul-tm3431361_0011 ntul-tm3431361_0012 ntul-tm3431361_0013 ntul-tm3431361_0014 ntul-tm3431361_0015 ntul-tm3431361_0016 ntul-tm3431361_0017 ntul-tm3431361_0018 ntul-tm3431361_0019 ntul-tm3431361_0020 ntul-tm3431361_0021 ntul-tm3431361_0022